පුංචි චන්දයෙන් පස්සේ අපේ පාර්ලිමේන්තු මන්ත්‍රීවරු හැසිරුනේ හරියට මහා මැතිවරණයක් අවසන් උනා වගේය. එතුමන්ලාට ලොකු හදිස්සියක් තිබුනේ කැබිනෙට් එක මාරු කිරීමත්, අගමැති මාරු කිරීමත්ය. එසේ විය හැකි රටවල් තිබුතත් ලංකාවේ කිසිදා එසේ නොවන බව චන්දදායකයා හොදින් දනී.
එතුමන්ලාගේ කාලයේ එසේවුයේවත් , මෙතුමන්ලගේ කාලයේ එසේ වන්නේවත් නැති බව අපි දනිමු. එය පාර්ලිමේන්තුවේ මෑත කාලයේ සිටි සහ දැන් සිටින ඕනෑම පක්ෂයක මන්ත්‍රීවරයකුගේ ලජ්ජා නහරය පරික්ෂා කිරීමෙන් බලා ගත හැක. වැඩක් නොගැනීමෙන් මානව පරිනාමයේ නැට්ටට සිදුවූදේම ලංකාවේ දේශපාලකයාගේ ලජ්ජා නහරයට සිදුවී ඇත.
චන්දදායකයා ගැන හරි කැක්කුමක් ඇතිනම් අපි පුංචි චන්දයයේ ජයග්‍රාහකයන්ගෙන් ඉල්ලන්නේ, ඉදිරි අවුරුදු කීහිපය, අප ලබා දුන් බලය හරියට පාවිච්චි කර, එහි ප්‍රතිලාබ චන්දදායකයාට දැනෙන වෙනසක් ඇති කරන ලෙසයි. වැඩේ හොදට ගියොත් ඊලග පළාත් චන්දෙට බයවෙන්න එපා කියල චන්දදායකයා සහතික කරනවාය. එත් වැඩේ අල කලොත්, අපිත් වැඩේ අල කරනවා සත්තයි. වැඩේ අලවුනොත් අප්පච්චිටත් අල වෙන බව මතක තබා ගත්තොත් වරදක් නැත.
නගර සභා, ප්‍රාදේශීය සභා හම්බකිරීමට හොද ඉල්ලම් කියලා චන්දදයකයා දනී, අපි ගෙවන වරිපනම් වැඩි උනාට, වැඩිවූ පහසුකම් මොනවද යන්න සොයා බලන්න, ඉතිරිය ඔබ ලග නේද ???. ලැජ්ජයි ද??. (ලැජ්ජා කොහෙද, නහරේ නැහැනේ ??).
පාර්ලිමේන්තුවේ ජහපාලන සෙට් එක පුංචි චන්දෙ පරාදවුන එකෙන් තමන්ගේ ගැන හරි තක්සේරුවක් කර ගත්තද යන්න සැක සහිතය, ඔවූන්ගේ හැසිරීම පහළ බාලාංශයටවත් ගැලපෙන්නේ නැති බව පෙනේ. චන්දදායකයාව අන්දන්න එන්නේ බාලාංශයේ ටීචර්ව අන්දන්න එන පොඩි එවුන් වගේය, හොර වැඩක්, දග වැඩක් අසුවුවිට “මම නෙමේ මෙයා” කියන්නා වගේය. මෛත්‍රීට අල්ලස් කොමසාරිස් ගෙදර යවපු එක මතකද මන්දා, රනිල්ට වෝක්ස්වැගන් මතකද මන්දා,
ගූගල් බැලුන්, සබීතගේ බිල්ඩිම, පොහොර සහනාදාරය, FCID කේස් ටික, WIFI පොරොන්දුව, ඔය ඔක්කටම වැඩිය මහ බැංකුවට දීපු ගේම චන්දදායකයා හට අමතක නැත.
2015 ජනවාරි 8ට පෙර, හොරු අල්ලන හැටි ගැන කියපු, ගුවන් තොටුපල වහන හැටි කියපු කටවල්. හඩවල්, තම සහෝදර පාර්ලිමේන්තු මන්ත්‍රීලා එකෙක් රිමාන්ඩ් උනාම, පක්ෂ බේදයකින් තොරව බන්ධනාගාර රෝහල ලෑස්තිකර දෙන්නේ, තමාගේ එකා කවුද කියා අපට මතක්කර දීමටය. ( චන්දදායකයාට නම් සාමාන්‍ය රෝහල බන්ධනාගාරයක් වෙන්නේ, බේත් නැති කමත්, ඉඩ නැති කමත්, රෝහල්වල වැඩ කරන වැඩිහරියක් තමන් පඩියක් ගන්නේ සේවයක් කිරීමට බව අමතක නිසාය. ඒක වෙනම කතාවකි). චන්දදායකයාට වැදගත් වන්නේ නිලය, බලය, ධනය, පක්ෂය, ජාතිය, බලන්නේ නැතිව, නීතිය සැමට එක සේ සැලකීමය, එත් ලංකාවේ හොරෙන් අඹ ගෙඩියක් කැඩීම් වැනි සාපරාධි ක්‍රියා වලට ගන්න විදිමත් ක්‍රියාමාර්ග, මහජනයාගේ මුදල් බිලියන ගණන් හොරාකනවුන්හට නොමැති බව පැහැදිලිය.
ජහපාලන නඩේ වැඩේ ගොඩදාන්න ෆොන්සේකාට නීතිය සහ සාමය දෙන්න යනවාය, ඒක හොද වැඩක් වෙන්න පුළුවන්ය, හමුදාවක් මෙහෙයවපු අත්දැකීම්, වැඩේ ගොඩ දැමීමට හොදටම ඇතිය. ගෝටා යුද්දෙන් පසුව කොලඹ හැදුව හැටි මතකනම්, ෆොන්සේකාට නීතිය සහ සාමය ගොඩනැගීම ලොකු දෙයක් නොවන්නේය, හමුදා විනය, අත්දැකීම් එයට පිටුවහලකි.
එත් ෆොන්සේකා මහින්දට 2015 වෙච්චදේ අමතක කලොතින්, ෆොන්සේකා, මෛත්‍රී, රනිල් 2020 පස්සේ විශ්‍රාමගැනීම අනිවාර්යවේ. රට ඉදිරියෙන් තැබීම, සැමට රටේ නීතිය එක සමාන බව චන්දදායකයාට දැනෙන්නට සැලැස්වීම කල යුතුම කාර්යයන්ගෙන් එකකි. මහින්දට වැරදුන මූලික කරුණක්වුයේ රටේ නීතිය තමන්ගේ එකාට එකක් සහ චන්දදායකයාට එකක්වීමය.
මර්වින්ට මිනිසුන් ගස් බදින්නට, ලන්සාට STF එකෙන් බේරෙන්නට, රෝහිතට නයි නටවන්නට, විමල්ට ගෙවල් නෑයන්ට බෙදන්නට, බැසිල්ට සියට දහයේ සිට හතලිහ දක්වා වැඩි කරන්නට, නාමල්ට ක්‍රිස්ලට ඉඩම් විකුණන්නට, යෝෂිතට හෙලෝ කෝප් ගන්නට, චිචිට රොකට් යවන්නට, නිශාන්තට ප්ලේන් හරවන්නට, කොටස් වෙළද පොළ හරහා EPF එක සුද්ද කරන්නට නීතියේ කිසිම බාදාවක් නොතිබුණි. ඒත් ටෙන්ඩර් බෝර්ඩ් එකේ වාඩිවූ ෆොන්සේකා ජම්පරය ඇන්දේය. පොල් ගෙඩියක් හොරකම් කල ළමයෙක්ට නීතිය ක්‍රියාත්මකවුනි.
චන්දදායකයාට අවශ්‍ය ෆොන්සේකා ඇවිත් මහින්ද, ෆොන්සේකාට දීපු එකට රිටන්දීම නොව, රටේ නීතිය සහ එහි ප්‍රයෝගික භාවය, ටොයියන්ටත්, බයියන්ටත්, චන්දදායකයාටත් එක ලෙස දැනීමය, දේශපාලනය නිසා ෆොන්සේකාට නැතිවූ ගෞරවය නැවත ලබාගැනීමට තිබෙන හොදම සහ අවසන් අවස්ථාව මෙය බව වටහා ගැනීම ෆොන්සේකාටත් රටටත් එක ලෙස හොදය. එහෙත් ජහපාලනයේ සිටින හොරුන්ටත් කෙළවෙනබව දන්නා නිසා ෆොන්සේකාගේ පැමිණීම සැක සහිතය.
මෛත්‍රී, ගෝටාව කරලියට ගේන්න ගේමක් ගහන බව ආරංචිය, මෛත්‍රී ගෙනාවත් නැතත් 2020 එන චන්දෙට ෂුවර් අස්සයා ගෝටාය. එහෙත් නාමල්, බැසිල්, සහ ශිරන්ති වැඩේ අනුමත කරයිද කියා දන්නේ නැත. ගෝටා ගෙනාවොත් මෛත්‍රී ට ඉතුරු අවුරුදු දෙක ඇදගැනීම ලෙහෙසිය, විශ්‍රාම සුවයටත් හොදය.
චන්දදායකයා අවදියෙන්, තවත් චන්දයක් ළග බව මතක් කරමින්, අදට නවතිමි.
මීට විශ්වාසී,
චන්දදායකයා.
Discussion about this post