පොලිස්පති පූජිත් ජයසුන්දර මහතා ඇතුළු පොලිස් දෙපාර්තමේන්තුවේ ඉහළ පෙළේ තනතුරු කිහිපයක් ඉදිරි දිනවල දී වෙනස් කිරීමට ජනාධිපති මෛත්‍රීපාල සිරිසේන මැතිතුමා තීරණය කර ඇත.
ත්‍රස්ත විමර්ශන ඒකකය බාර නියෝජ්‍ය පොලිස්පති නාලක ද සිල්වා මහතා කර ඇති ප්‍රකාශ සම්බන්ධයෙන් සහ පොලිස්පතිවරයාගේ පසුගිය කාලසීමාවේ හැසිරීම සම්බන්ධයෙන් සැලකිල්ලට ගනිමින් මෙම තීරණය ගෙන ඇතැයි දේශපාලන ආරංචි මාර්ග අනාවරණය කරනු ලැබේ.
ඒ අනුව ජනාධිපතිතුමා රටේ ආරක්ෂාව හා ප්‍රභූ ආරක්ෂාව පිළිබඳ සැලකිළිමත් වෙමින් ඉදිරි දින කිහිපය ඇතුළත දී පොලිසියේ ඉහළ පෙලේ තනතුරු වෙනස් කිරීම සිදු කිරීමට නියමිත බව සදහන් වේ.
ජනාධිපතිවරයා සහ හිටපු ආරක්ෂක ලේකම් ගෝඨාභය රාජපක්‍ෂ මහතා ඝාතනය කිරීමක් ගැන නියෝජ්‍ය පොලිස්පති නාලක සිල්වා මහතා හා පොලිසියේ උසස් නිලධාරීන් කිහිප දෙනකු සම්බන්ධයෙන් දූෂණ විරෝධී බලකායයේ මෙහෙයුම් අධ්‍යක්ෂක නාමල් කුමාර මහතා පසුගිය 12වනදා පැවැති මාධ්‍ය හමුවකදී අනාවරණය කර තිබූ අතර නාමල් කුමාර මහතා සහ ත්‍රස්ත විමර්ශණ අංශයේ අධ්‍යක්ෂක නාලක සිල්වා මහතා අතර වූ දුරකථන සංවාද කිහිපයක් මාධ්‍යට නිකුත් කර තිබුණි.
මාකඳුරේ මධූෂ් නැමති පාතාල නායකයා යොදවා මෙම ඝාතනය සැලසුම් කර ඇති බවත් මෙහිදී නාමල් කුමාර අනාවරණය කළේය.
කෙසේ වෙතත් මාකඳුරේ මධූෂ් නැමැත්තාගේ පියාගේ අවමංගල්‍ය අවස්ථාවේ එම නිවසට විශාල දායකත්වයක් ලබා දෙමින් කටයුතු කළ මහින්ද පිලේ මාතර දිස්ත්‍රික් මන්ත්‍රීවරයෙකු ගැනද මේ දිනවල ඡායාරූපද සහිතව අන්තර්ජාලයේ තොරතුරු හුවමාරුවෙමින් තිබේ.
එසේම පසුගියදා හිටපු ජනාධිපති මහින්ද රාජපක්‍ෂ මහතා ද මේ සම්බන්ධයෙන් අදහස් දක්වා තිබුණි.
නියෝජ්‍ය පොලිස්පති නාලක ද සිල්වා මහතා සිදු කර ඇති බව කියන ප්‍රකාශය සම්බන්ධයෙන් මේ වන තෙක් ආරක්ෂක අංශ පරික්ෂණ ආරම්භ කර ඇති බවක් පෙනෙන්නට නොමැති බව හිටපු ජනාධිපතිවරයා පැවසූ අතර වහාම ආරක්ෂක අංශ මේ සම්බන්ධයෙන් පරික්ෂණයක් පවත්වා සත්‍ය තත්ත්වය රටට පැහැදිලි කළ යුතු බව ඔහු සඳහන් කළේය.
Discussion about this post