“ණයක් ලැබෙද්දී රතිඤ්ඤා පත්තු කිරීමෙන් ම පේනවා අපේ රට වැටී ඇති ආර්ථික ප්‍රපාතයේ තරම,” යැයි ජාතික ජන බලවේගයේ නායක, කොළඹ දිස්ත්‍රික් පාර්ලිමේන්තු මන්ත්‍රී අනුර කුමාර දිසානායක පවසයි.
මේ ලැබුණෙ තවත් එක් ණයක් මිස ආධාරයක් නොවන බව අහිංසක ජනතාව තේරුම් ගත යුතු බව ද ඔහු අවධාරණය කරයි.
“අපේ රටේ සෑම ඉදිකිරීමක් පිටුපස ම තිබුණේ වංචාව, දූෂණය, නාස්තිය පිළිබඳ සාධකයයි. ඒ නිසා අපට හයිවේ එක, ගුවන් යානාවක් පැමිණෙන විට ප්‍රවෘත්තියක් වන ගුවන්තොටුපොළ අපට බරක් වෙලා තිබෙනවා. කොවිඩ් වසංගතයෙන් පසු ඇන්ටිජන් ගනුදෙනු, වැක්සින් ගනුදෙනු ගැන අසන්න ලැබෙනවා. දැන් ජාත්‍යන්තර මූල්‍ය අරමුදලෙන් ණයක් ලබා ගැනීමට හැකිවීම පිළිබඳව අලුත් බලාපොරොත්තුවක් ඇති කර තිබෙනවා. ණයක් ලබාගන්නා විට රතිඤ්ඤා පත්තු කිරීමෙන් පෙනෙන්නේත් අපේ රට වැටී ඇති ආර්ථික ප්‍රපාතයේ තරමයි.
පාඩු ලබන රාජ්‍ය ආයතන විකිණීම පිළිබඳ නැවත සාකච්ඡාවක් පැමිණ තිබෙනවා. කැබිනට් මණ්ඩලය තීන්දුවක් ගත්තා ටෙලිකොම් ආයතනය ගැන රජය සතුව ටෙලිකොම් ආයතනයේ 49%ක කොටස් තිබෙනවා. 2022 බදු ගෙවීමෙන් පසු ලාභය රු. මිලියන 12,000යි. සමාගමේ මුළු වත්කම් ප්‍රමාණය බිලියන 200යි. අපට බිලියන 98ක රාජ්‍ය වත්කමක් තිබෙනවා. ලංකා හොස්පිට්ල් රාජ්‍ය වත්කමක් සහ ලාභ ලබන ආයතනයක් බවට පත් කළ හැකිව තිබෙනවා. ඉදිරියේදී ශ්‍රී ලංකා රක්ෂණ සංස්ථාව විකිණීමට ආණ්ඩුව බලාපොරොත්තු වෙනවා.
අපේ රටේ ආර්ථිකය පවතින්නේ නීත්‍යනුකූල ආර්ථිකයත් කළු ආර්ථිකයක් යන දෙක එකට ම යි. එය මොනතරම් සමාජගත වී ඇත් ද යන්න ‘මහින්ද රාජපක්ෂ මහත්තයා සංවර්ධනය කරලනේ හොරකම් කළේ’ යන ප්‍රකාශයෙන් පේනවා. දූෂණයෙන් තොර වූ රාජ්‍යයක් ගැන සිතන්න පවා අපහසුයි. පසුගිය දා පුවත්පතකට නාමල් රාජපක්ෂ “අල්ලස දූෂණය නතර කළොත් අපේ රට වැටෙනවා” යනුවෙන් ප්‍රකාශයක් කර තිබුණා. වංචා, දූෂණ අවම වූ රාජ්‍යයක් පිළිබඳ සිහින මවන්නට බැරි තරමට සමාජ මතයක් ගොඩනැඟී තිබෙනවා. එය අපේ රටේ අනිවාර්ය සාධකයක් බවට පත්වී තිබෙනවා. එය ඉවත් කරනවා යැයි කීම මනෝරාජික අදහසක් බවට පත්වෙලා. අද ඇති වී තිබෙන ආර්ථික අර්බුදයට අපේ ආර්ථික ප්‍රතිපත්ති වගේ ම වංචාව, දූෂණය, අල්ලසත් ප්‍රධාන පංගුවක් වෙලා තිබෙනවා,” යැයි ද හෙතෙම වැඩිදුරට ත් කීය.
අනුරාධා හේරත් (මව්බිම)
Discussion about this post